Selonc les ovres que li oi.'
Est-ce granz enors endroit moi ?
Je soloie jà avoir drue;

Mais or l'ai, ce m'est vis, perdue."
"Sire, qui vos a destorbé?"
"Cele qui tant jorz m'a amé
Et fera encor, se Dex plaist.
Ne m'est mestier c'ancor me laist.
Or vos conterai autre rien.
Estrange nature a en chien.
Quel es[t] Hudent devenu ?
Quant cil l'orent .iij. jorz tenu,
Ainz ne vost boivre ne mangier;
Por moi se voloit enragier.
Donc abatirent au brechet
Lo bel lien o tot l'uisset.
Ainz ne fina, si vint à moi.
Par cele foi que je vos doi!
Certes, je'l gart en ma saisine
A celui ens cui me destine
Qu'ancor ferons ensanble joie.
Por moi lairoie Ysiaut la Bloie.

Car lo me mostrez orandroit,
Savoir se il me conoistroit.”
"Connoistre ! vos dites richece.
Po priseroit vostre destrece;
Car puis que Tritan s'an ala,
Home de lui ne s'aprima

Qu'il ne volsist mangier as danz.
Il gent en la chanbre loianz.
Damoisele, amenez-lo çà.”
Brangien i cort, s'ou desloia.
Qant li brechez l'oï parler,
Lo lien fait des mars voler
A la meschine qui'l amoine;
De venir à Tritan se poine,
Se li cort, liève la teste:
Onques tel joie ne fist beste ;
Boute do grain et fiert do pié:
Toz li monz en aüst pitié ;
Ses mains loiche, de joie abaie.
Voit-lo Ysiaut, formant s'esmaie,
Craint que il soit enchanteor
O aucun boen bareteor.

Tritan ot povre vestéure,

Au brachet dit: "La norriture
C'ai mise en toi soit beneoite!

Ne m'as mie t'amor toloite,
Moult m'as montré plus bel sanblant
Que celui cui j'amoie tant.
Ele cuide que je me faigne,
Ele verra la destre enseigne
Q'ele me dona en baisant
Qant départimes en plorant:
Cest enelet petit, d'or fin,
Moult m'a esté pruchien voisin.
Mainte foiz ai à lui parlé
Et quis consoil et demandé.
Qan ne me savoit respondre,
Avis m'iert que déusse fondre.
Par amor laissai l'esmeraude,
Mi oil moillèrent d'eve chaude."
Ysiaut conut bien l'anelet
Et vit la joie del brechet
Que il fait, à poi ne s'anrage;
Or s'aperçoit en son corage

C'est Tritans à cui ele parole:

"Lasse! fait-ele, tant sui fole!
Hé! mauvais cuers, por que ne fonz
Qant ne conois la rien el mont
Qui por moi a plus de tormant?
Sire, merci! je m'an repant.”
Pasmée chiet. Cil la reçoit.
Or voit Brangien ce qu'el voloit.
Qant el revint, el flans l'anbrace;
Lo vis et lo nés et la face
Li a plus de mil foiz baisié:
“Ha! Tritan, sire, quel péchié,
Qui tel poine sofrez por moi!
Don mal soie fille de roi,

S'or ne vos rant lo gueredon!
Quel les, Brangien, quel la feron?”
"Dame, n'el tenez mie à gas.
Alez, si li querez les dras.

Il est Tritanz, et vos Ysiaut:
Or voit-l'an bien qui plus se deut
A moult petitet de choison."
Et dit: "Quel aise li feron?"

"Tandis con vos avez loisir,

Moult vos penez de lui servir

Tant que Mars veigne de rivière;
Car la trovast-il plenière

Qu'il ne venist devant .viij. jorz."

A cez paroles, sanz grant cri,
Con vos avez ici oï,

Entre Tritan sor la cortine,

Entre ses braz tient la raïne.

FIN DU PREMIER VOLUME.

IMPRIMERIE DE CHARLES WHITTINGHAM, TOOKS COURT.

R