Par Deu qui l'air
Ne me mandez nule foiz mais.
Je vos di bien, Tristran, à fais,
Certes je n'i vendroie mie.
Li rois pense que par folie,
Sire Tristran, vos aie amé;
Mais Dex plevis ma loiauté,
Qui sor mon cors mete flaele
S'onques, fors cil qui m'ot pucele,
Out m'amistié encor nul jor.
Se li félon de cest enor,
Por qui jadis vos combatistes
O le Morhout quant l'océistes,
Li font acroire, ce me senble,
Que nos amors jostent ensenble,
Sire, vos n'en avez talent;
Ne je, par Deu omnipotent!
N'ai corage de druerie
Qui tort à nule vilanie.
Mex voudroie que je fuse arse,
Aval le vent la poudre esparse,
Jor que je vive, que amor.
Aie o home qu'o mon seignor;
Et, Dex! si ne m'en croit-il pas,
Je puis dire de haut si bas.
Sire, moult dist voir Salemon:
"Qui de forches traient larron
"Jà pus ne l'amerot nul jor."
Se li félon de cest enor
deusent il céler
Molt nos estut mal endurer.
De la plaie que vos pristes
En la batalle que féistes
O mon oncle, je vos gari.
Se vos m'en criez, ami,
N'ert pas mervelle, par ma foi!
Et il ont fait entendre au roi
Que vos m'amez d'amor vilaine.
Si voient-il Deu et son reigne,
Jà nul verroient en la face!
Tristran, gardez, en nule place
Ne me mandez por nule chose:
Je ne seroie pas tant ose
Que je i osase venir.
Trop demor ci, n'en quier mentir.
S'or en savoit li rois un mot,
Mon cors seret desmenbré tot,
Et si seroit à molt grant tort;
Bien sai qu'il me dorroit la mort.
Tristran, certes li rois ne set
Que por lui pas vos aie ameit.
Por ce qu'eres du parenté,
Vos avoie-je en chierté.
Je quidai jadis que ma mère
Amast molt les parenz mon père,
Et disoit ce que jà mollier
N'en auroit jà seignor [meins] cher
Qui les parenz n'en amereit.
Molt est cortois li rois mi sire,
Jà nu pensast nul jor par lui
Q'en cest pensé fuson andui;
Mais l'en puet home desvéier,
Faire le mal et bien laisier.
Si a-t-on fait de mon seignor.
Tristran, vois m'en, trop i demor."
Ame, por amor Deu! merci.
Mandai toi, et or es ici;
Entent un poi à ma proière:
Jà t'ai-je tant tenue chière."
Quant out oï parler sa drue,
Sout que s'estoit apercéue;
Deu en rent graces et merci,
Or set que bien istront de ci.
"Ahi! Yseut, fille de roi,
Franche, cortoise, bone foi,
Par plusors foiz vos ai mandée;
Puis que chambre me fu véé[e],
Ne puis ne poi à vos parler.
Dame, or vos vuel merci crier
Qu'il vos menbre de cest chaitif
Qui à traval et à duel vis;
Qar j'ai tel duel c'onques le roi
Out mal pensé de vos vers moi,
Qu'il n'i a el fors que je muere.
Dame
|