Garda, vit venir Gondoïne,
Et s'en venoit de son recet.
Tristran li a fait .i. aget,
Repost se fu à l'espinoi.
« Ha! Dex, fait-il, regarde-moi,
Que cil qui vient ne m'aperçoive
Tant que devant moi le reçoive."
Ensus l'atent, s'espée tient.
Gondoïne autre voie tient.
Tristran remest, à qui molt poise;
Ist du buison, cele part toise;
Mais por noient, quar cil s'esloigne,
Qui en fel leu a mis sa poine.
Tristran garda, au luien si vit,
Ne demora que .i. petit,
Denoalan venir anblant
O deus levriers mervelles grant.
Afuilez est à .i. pomier.
Denoalent vint le sentier
Sor .i. petit palefroi noir,
Ses chiens out, envoie mover
En .i. espoise .i. fier sengler.
Ainz qu'il le puise desangler,
Aura lor mestre tel colée
Que jà par mire n'ert sanée.
Ristran li preux fu desfublez.
Denoalent est tost alez,
Ainz n'en sout mot. Quant Tristran saut,
Fuir s'en veut; mais il i faut.
Tristran li fu devant trop près,
Morir le fist: qu'en pout-il mès ?
Sa mort queroit; cil s'en garda,
Que le chief du bu li sevra.
Ne li lut dire: "Tu me bleces."
O l'espée trencha les treces,
En sa chauce les a boutées,
Quant les aura Yseut mostrées,
Qu'ele l'en croie qu'il l'a mort.
D'iluec s'en part Tristran a fort.
"HA! las! fait-il, qu'est devenuz
Gondouïne, or s'est toluz,
Que vi venir orainz si tost?
Est-il passez à là tantost?
S'il m'atendist, savoir péust
Jà mellor gueredon n'éust
Que Doalan le fel enporte,
Que j'ai laisié la teste morte."
Tristran laise le cors gesant
En mie la lande, envers, sanglent;
Tert s'espée, si l'a remise
En son fuerre, sa chape a prise;
Le chaperon el chief, s'en vet;
Sor le cors .i. grant fust a tret,
A la chanbre sa drue vint;
Mais or oiez com li avint.
Gondoïne fu acoruz
Et fu ainz que Tristran venuz,
La cortine ot dedenz partie,
Vit la chanbre qui fu jonchie,
Tot vit quantque dedenz avoit,
Home fors Perinis ne voit.
Brengain i vint, la damoisele,
Où out pignié Yseut la bele,
Le pieigne avoit encor o soi.
Le fel, qui fu à la paroi,
Garda, si vit Tristran entrer
Qui tint .i. arc d'aubor aucer;
En sa main tint ses .ii. seetes,
En l'autre .ii. treces longuetes,
Sa chape osta, pert ses genz cors.
Yseut la bele, o les crins sors,
Contre lui liève, si'l salue,
Par sa fenestre vit la nue
De la teste de Gondoïne.
De grant savoir fu la roïne,
D'ire tresue sa persone.
Yseut Tristran en araisone:
"Se Dex me gart, fait-il au suen,
Vez les treces Denoalen.
Ge t'ai de lui pris la venjance.
Jamais par lui escu ne lance
N'iert achatez ne mis en pris.”
"Sire, fait-ele, ge q'en puis?
Mais prie vos que cest arc tendez,
Et verron com il est bendez."
Tristran s'esteut, si s'apensa,
Oiez, en son penser tensa,
Prent s'entente, si tendi l'arc,
Enquiert noveles du roi Marc.
Yseut l'en dit ce qu'ele en sot.
S'il en péust vis eschaper,
Du roi Marc et d'Iseut sa per
Referoit sordre mortel gerre.
Cil, qui Dex doinst anor conquerre !
L'en gardera del eschaper.
Yseut n'out cure de gaber,
A mis une seete en corde,
Garde du fil qu'il ne remorde :
"Je voi tel chose dont moi poise.
Tristran, del arc nos pren ta toise."
Tristran s'estut, si pren sa pose,
Bien sait qu'el voit aucune chose
Qui li despleist, garda en haut,
Grant poor a, trenble et tresaut;
Contre le jor, par la cortine,
Vit la teste de Godoïne:
"Ha! Dex, vrai roi, tant riche trait Ai d'arc et de seete fait !
|