Cil chevalier d'estrange terre
Bohorderont por los aquerre,
Et por l'amor Yseut m'amie
I ferai tost .i. esbaudie.
Sus la lance soit le penon
Dont la bele me fist le don.
Mestre, or alez, pri-vos forment
Que le faciez molt sauvement."
Governal vint à son ostel,

Son hernois prist, ainz ne fist el,
Puis si se mist tost à la voie,
Il n'a cure que nus le voie;
Tant a erré que enbuschiez s'est.
Sor la mote, au chief de la mare,
S'asist Tristran, sanz autre afaire,
Devant soi fiche son bordon;
Atachié fu à .i. cordon

A qui l'avoit pendu au col.
Entor lui sont li taier mol.
Sor la mote forment se tret;
Ne senbla pas home contret,
Qar il ert gros et corporuz,

Il n'ert pas nains, contrez, boçuz.
La rote entent, là est assis,
Molt ot bien botelé son vis.
Qant aucun passé devant lui,
En pleignant disoit : "Mar i fui.
Jà ne quidai estre aumosnier
Ne servir jor de cest mestier;
Mais n'en poon or mais el faire."
Tristran lor fait des borses traire,
Que il fait tant chascun li done;
Il les reçoit que nus n'en sone.
Tex a esté .vii. anz mignon
Ne set si bien traire guignon.
Méismes li corlain à pié
Et li garçon li plus prisié
Qui vont mangant par le chemin ;
Tristran, qui tient le chief enclin,
Lor aumosne por Deu lor quiert.
L'un l'en done, l'autre le fiert.
Li cuvert gras, li deffaé,
Mignon Herlot l'ont apelé.

Escoute Tristran, mot ne sone;

Por Deu, ce dit, le lor pardone.
Li corbel, qui sont plain de rage,
Li font ennui, et il est sage,
Truant le claiment et berlot.
Il les convoie o le puiot,
Plus de .xiiii. en fait saignier
Si qu'il ne puent estanchier.
Li franc vaslet de franc orine
Ferlin ou maales esterline
Li ont doné; il les reçoit,
Il lor dit que il a toz boit:
Si grant arson a en son cors,
A poine l'en puet geter fors.
Tuit cil qui l'oient à parler,
De pitié prenent à plorer;

Ne tant ne quant pas nu mescroient
Qu'il ne soit ladres cil qu'il voient.
Pensent vaslet et escuier

Qu'il se hast de nus alégier
Et des très tendre lor seignors,
Pavellons de maintes colors.

N'i a riche home n'ait sa tente.

A plain erre chemin et sente.
Li chevalier vienent après;

Molt a grant presse en cel marchés,
Effondré l'ont, mos est li fans,
Li cheval entrent jusq'as flans,
Maint en i chiet, qui que s'entraie.
Tristran s'en ist, point ne s'esmaie,
Par contraire lor dit à toz:
"Tenez vos reignes par les noz,
Si hurtez bien de l'esperon.
Par Deu! férez de l'esperon,
Qu'il n'a avant point de taier."
Qant il pensent estre essaier,
Li marois font desoz lor piez;
Chascun qui entre est entaiez.
Qu'il n'a hueses s'en a soffrete.
Li ladres a sa main fors traite;
Qant en voit .i. qui el tai voite,
Adont flavele cil à-cuite.

Qant il le voit plus en fangoi,
Li ladres dit: "Pensez de moi.
Que Dex vos get fors du Mal Pas!

Aidiez à noveler mes dras."
O sa botele el henap fiert,
En estrange leu les requiert ;
Mais il le fait par lécherie.
Qant or verra parler s'amie,
Yseut, qui a la crine bloie,
Que ele avoit en son cuer joie!
Molt a grant noise en cel Mal Pas..
Li passéor sollent lor dras.

De luien puet-l'um oïr les huz
De ceus qui solle la paluz.

CI qui les passe n'est senez.

Atant ès-vos le roi Artus,

Esgarder vient le passéor,
O lui de ses barons plusor;
Criement que li marois ne fonde.
Tuit cil de la Table-Réonde
Furent venu sor le Mal Pas

O escus frès, o chevaus cras,
De lor armes entreseignié.

Tuit sont covert et mons que pié.